Ojehúva ha ohasáva oúvo ko'ã ára ohóvape diputado kolo'o “añetete” Freddy D’Ecclesiis ha umi miembro ifamilia ndive oipyhýva umi arista inverosímil, oñeha'ãrõ'ÿva.
Umi agente fiscal Marcelo Pecci ha Hugo Volpe omoañete ndorekóiha evidencia ojoajúva legislador orekóva umi 448 kilo kokaína ojehecháva peteî estancia Itapúape, oñembohasáva upe tenda peve peteî avioneta upéi ojejuhúva, upéva ndive poteî aeronave, peteî estancia San Pedro gotyo, peteî hangar oimehápe iju'yke'i Juana Carolina Vera.
Omomýiva ñembohory pya'etereígui oñemohu'ã oguahëva fiscal-kuéra ohekýivo diputado ko kásogui, jepénte oime heta mba'e ivaíva ha umi antecedente ojuasáva ijehe ha hetápe omopensa ikatúgui ha oime narcotráfico ndive joajúpe.
Opáichagua mba'e ombojesarekóva lo mitãme, ha'eháicha hangar umi aviõ okañýva Dinac ýrõ Senad rope'aguýgui, oñeimo'ã upévagui orekóha agente isarambíva ko'ã tendáre, imbarete tráfico estupefaciente.
Upévagui diputado D’Ecclesiis ndojegueroviapái pe estancia ogayguágui ojeréva hese, pe ha'e oikohápe, omýi jeju ha jehópe flota aérea. Ikatu mba'e ningo ko'ã fiscal oñemondýi opóigui diputado sampedrano Cartismo carpa ha oñemoirû “añetete” rehe.
Pág. 10