Emoñe’ẽ.
Huã Marangatu
Ohai David Galeano Olivera.
I
Péinango og̃uahẽ
Ára guasuete
Ñamomorãháme
San Juan arete
Ha opaite henda rupi
Ko ñane retãme
Aty tuichaicha
Jahecháta oiko
Ha vy’a, torýpe
Umi rupi jaháta
Javy’a hag̃ua
Oñondivepa.
Lea más: Guarani ñe’ẽ ha iñe’ẽporãhaipyre
II
Kakuaa, mitã
Ha opavavetéva
Ñasẽta jaha
Vy’aguasuhápe
Jajuhutahápe
Ñembosaráita
Karréra vosa,
Páila jeheréi,
Pelóta tata,
Guata tata ári,
Kambuchi joka
Hetave apytépe
Ombohetia’éta
Ñande rekove.
III
Upéicha avei
Jajuhukuaáta
Tembi’u hete
Hyakuã asýva
Mbeju ha chipa,
Pajagua maskáda,
Pastel mandi’o,
Chipa kavure
Chicharõ trensádo
Ha ambue mba’e
Ndehepajepéva.
IV
Korapy guasúpe
Jahecháta oĩ
Heta tapicha
Omoñepyrũva
Aipo pericón
Ha upeichahágui
Oñe’ẽreitýva
Ijykereguápe
Ha amo ipahápe
Peteĩ he’íta
“Topa pericón
Ha toñepyrũ
Polka kyre’ỹ”
Péicha jahasa
Oñondivepa
Vy’a guasuete
Ijojaha’ỹva
San Juan araitépe.
Fuente: https://bit.ly/3WFlvIB