Che mbo’ehára
Mitã ñaimehaguéicha py’a marangatúpe
Ñane mbo’eharakuéra jaropuraheimi.
Ñe’ê hovy satîva taipu ñande jurúpe
Ha yvoty morotîcha hapépe ñamoi.
Ñane mbo’eharakuéra, maestra ñahenóiva,
Oikóva sy ha túva rekoviáma opyta.
Ñane ñe’ã kuáagui joheipyre heñóiva
Mborayhu hechapyrã chupekuéra guarã.
Tapépe jahecháva hoky ha hendypúva,
Ñanerenonderãme po’a ha arandu;
Mbo’ehárante omoiva, mbo’ehárante oñopûva
Ko’êre ñane akãgui oikóva ohavi’u.
Ko’erõ ñaguahêvoma upe po’a ru’ãme
Aníke tesaráipe mbo’ehára jaheja;
Jepe mombyryvérõ toikove ñane akãme
Ku mainumby hovýicha tojora mandu’a.
Darío Gómez Serrato rembiapokue
Che mbo’eharépe
Tamoapesã che ñe’ẽ mayma yvoty rekovia
ha ipype toroañua ko che py’a renyhẽ,
hetámi nde chembo’e chemitã’ípe yma
ha heta mba’e porã aikuaa nderehae.
Upéinte che karia’y, ko’ýte chemandu’a
etémi che akãhatã ha heta roipy’apy,
sapy’ánte nde pochy, pe che nambi reipoka,
ha neipamírõ ĝuarã vokóikema rembyasy.
Hetáko nderehae oiko chugui karia’y
ha mañaípa itavy osẽ porã joaite,
ajépa oiméne ndave revy’a, nde juruvy,
rehecháramo ipoty, omimbi nde rapekue.
Kokuehe rohecha rehasa mombyrimi,
akói nekuñataĩ, ava piko toimo’ã,
ha che katu che tuja, osẽ osẽma che atĩ,
ha che rova anga icha’ĩ, mbykýma che raperã.
Teodoro Salvador Mongelós
Epifanio Méndez Fleitas
Mbo’eharakuéra
Mbo’eharakuéra katupyry
Mbo’eharakuéra marangatu
che peẽme ha’e, aníke penekangy
pemba’apórõ oñondivepa
katuete iporãva osẽva’erã
Mitãnguéra pende pópe oĩ
hesekuéra rehehápe napenekangýiva’erã
mba’eporãnte peẽ peipota
ojupe peñomombarete va’erã
Peẽ mbo’eharakuéra
pene rembiapo ijojaha’ỹva
mavave nomomba’éiva
Ñandejára tapenderovasa
opaite mba’e pehupyty hag̃ua.
Digna Delvalle
Vy'apave mbo’aharakuérape hi’árare!
Jahechauka chupekuéra ñande aguije ha mborayhu.